ខេត្តមណ្ឌលគិរី ៖ កន្លងមកស្ថានភាពផ្លូវក្នុងក្រុងសែនមនោរម្យ ២ខ្សែ ធ្លាប់តែតូចចង្អៀតលំបាកសម្រាប់ពលរដ្ឋ ក្នុងការធ្វើចរាចរទៅមកប្រចាំថ្ងៃ។ បច្ចុប្បន្ននេះ ប្រែក្លាយពីស្ថានភាពផ្លូវលំបាក ទៅជាផ្លូវដែលមានគុណភាពរឹងមាំ ងាយស្រួលធ្វើដំណើរនោះ  អាជ្ញាធរខេត្តមណ្ឌលគិរី  បានកំពុងអភិវឌ្ឍផ្លូវកៅស៊ូ និងបេតុង ២ខ្សែ ប្រវែង ៣,៣២០ម៉ែត្រ នៅក្រុងសែនមនោរម្យ ក្នុងការដំណើរមានភាពងាយស្រួល និងលើកកម្ពស់ជីវភាពរស់នៅរបស់ប្រជាពលរដ្ឋនៅមូលដ្ឋាន។

លោក ញ៉ែម រ៉ា នាយកទីចាត់ការហិរញ្ញវត្ថុសាលាខេត្តមណ្ឌលគិរី បានឱ្យដឹងថា ដោយការយកចិត្តទុកដាក់ពីសំណាក់ឯកឧត្តម ថង សាវុន អភិបាលខេត្តមណ្ឌលគិរី ផ្លូវក្រាលកៅស៊ូ ដែលមានសភាពទ្រុឌទ្រោមដាច់ជាផ្លូវសំបុកមាន់មានជង្ហុកច្រើន ដែលតែងតែបង្កការលំបាកសម្រាប់ប្រជាពលរដ្ឋធ្វើដំណើរ  បច្ចុប្បន្ន បាននឹងកំពុងស្ថាបនាផ្លូវកៅស៊ូ និងបេតុង ២ខ្សែ ប្រវែង ៣,៣២០ម៉ែត្រ រួមមាន៖ ១.ផ្លូវចាក់បេតុងឆ្អឹងដែកកម្រាស់០.១៥ម៉ែត្រ ប្រវែង ៥៩០ម៉ែត្រ ទទឹង ១២ម៉ែត្រ និងធ្វើលូជ្រុងបង្ហូរ ទឹកភ្លៀង ទំហំ០.៧០ម៉ែត្រ គុណ ០.៩០ម៉ែត្រ ប្រវែង ១.១៨០ម៉ែត្រ ស្ថិតនៅភូមិជ្រៃសែន សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី។ ២.ផ្លូវទំនប់សុខដុម ចេញពីសួនសម្តេចតេជោ ហ៊ុនសែន សែនមនោរម្យ ដល់សាលាសង្កាត់សុខដុម ក្រុងសែនមនោរម្យ ខេត្តមណ្ឌលគិរី ប្រវែង ៩១០ម៉ែត្រ ដោយចាក់កៅស៊ូ DBST ទទឹង ៧.២ម៉ែត្រ ចាក់បេតុងឆ្អឹងដែកកម្រាស់ ១៥ស.ម ទទឹង ២ម៉ែត្រសងខាង ដាក់លូបង្ហូរទឹកភ្លៀងមុខកាត់ ០.៨០ម៉ែត្រ សងខាងផ្លូវសរុបប្រវែង ១.៨២០ម៉ែត្រ មានខ្នោះអណ្ដូងចំនួន ៧១ ធ្វើចិញ្ចើមផ្លូវដើរ ចាក់បេតុងឆ្អឹងដែកកម្រាស់ ១២ស.ម ទទឹង ២ម៉ែត្រសងខាង ផ្ទៃក្រឡា ៣.៦៤០ម៉ែត្រការ៉េ និង ចាក់ប៊រឌៀចិញ្ចើមផ្លូវសងខាង ប្រវែង ១.៨២០ម៉ែត្រ ស្ថិតនៅភូមិដោះក្រមុំ សង្កាត់សុខដុម ក្រុង សែនមនោរម្យ ខេត្តមណ្ឌលគិរី ។

លោក នាង វណ្ណៈ នាយករដ្ឋបាលសាលាខេត្តមណ្ឌលគិរី បានឱ្យដឹងថា ការសាងសង់ផ្លូវបេតុង និងផ្លូវកៅស៊ូ ២ខ្សែនាពេលនេះ គោលបំណង ឱ្យការធ្វើដំណើរ និងការដឹកជញ្ជូនទំនិញរបស់ប្រជាពលរដ្ឋកាន់តែងាយស្រួល ជាពិសេស ដើម្បីឱ្យក្រុងសែនមនោរម្យ កាន់តែមានសោភ័ណភាព និងអាចទាក់ទាញភ្ញៀវទេសចរមកទស្សនាកម្សាន្ត នៅ កាន់តែច្រើនឡើង។ លោក បញ្ជាក់ថា ទោះបីបច្ចុប្បន្ន មានស្ថានការណ៍នៅតាមបណ្តោយព្រំដែន កំពុងប្រឈមឈ្លានពានរបស់សៀមក៏ដោយ រាជរដ្ឋាភិបាល ក៏ដូចជាអាជ្ញាធរខេត្ត មិនអាចបោះបង់ការអភិវឌ្ឍបានឡើយ ព្រោះវាជាមូលដ្ឋាន សម្រាប់ភាពរឹងមាំរបស់សង្គម និងប្រទេសជាតិ។  លោក បានណែនាំដល់ក្រុមហ៊ុនម៉ៅការផ្លូវទាំងនេះ ត្រូវសាងសង់ឱ្យបានត្រឹមត្រូវតាមស្តង់ដារបច្ចេកទេស ដើម្បីធានាភាពរឹងមាំ និងប្រើប្រាស់បានយូរអង្វែង។ លោក នាង វណ្ណៈ ក៏បានអំពាវនាវឱ្យប្រជាពលរដ្ឋ បន្តរក្សាសន្តិសុខ សាមគ្គីភាព និងសហការជាមួយអាជ្ញាធរមូលដ្ឋាន ក្នុងការចូលរួមថែរក្សាការពារសមិទ្ធផលនានា និងអភិវឌ្ឍហេដ្ឋារចនាសម្ព័នជាបន្តបន្ទាប់៕