ភ្នំពេញ៖ សម្តេចតេជោ ហ៊ុន សែន នារាត្រីថ្ងៃទី២០ ខែមីនា ឆ្នាំ២០២៦នេះ បានជូនដំណឹងថា មានក្រុមជនក្បត់ជាតិមួយចំនួនបានបង្កើតគណនី និងផេកហ្វេសបុកក្លែងក្លាយ ដោយយករូបថត និងឈ្មោះរបស់សម្តេចទៅប្រើប្រាស់ ដើម្បីបង្ហោះព័ត៌មានមិនពិត និងបង្កការភាន់ច្រឡំដល់សាធារណជន។

សម្តេចតេជោ ហ៊ុន សែន បានរៀបរាប់សារយ៉ាងដូច្នេះថា «តើពួកក្បត់ជាតិនេះបើមិនបានភូតកុហកវាងាប់ឬអី? បានជាពួកវាបន្តបោកប្រាស់ប្រជាជនបែបនេះ។ កន្លងមកពួកក្បត់ជាតិបង្កើតផេកហ្វេកបុកក្លែងក្លាយមួយ ដែលមានរូបថត និងឈ្មោះខ្ញុំនិងតែងបង្ហោះព័ត៌មានមិនពិត។ ខ្ញុំសូមបងប្អូនអ្នកប្រើប្រាស់ ហ្វេសបុកប្រុងប្រយ័ត្ន កុំចាញ់បោកពួកក្បត់ជាតិទាំងនេះ។ ខ្ញុំមានហ្វេសបុកតែមួយដែលមានអ្នកតាមដានជាង១៥លាននាក់ដែលខ្ញុំសូមបង្ហោះភ្ជាប់ជាមួយ»៕