ខេត្តមណ្ឌលគិរី ៖ ថ្ងៃទី២៥ ខែឧសភា ឆ្នាំ២០២៦នេះ នៅទីបញ្ជាការតំបន់ប្រតិបត្តិការសឹករងមណ្ឌលគិរី លោក ឧត្តមសេនីយ៍ទោ សាន គឹមអឿន​ មេបញ្ជាការ តំបន់ប្រតិបត្តិការសឹករងមណ្ឌលគិរី យោធភូមិភាគទី១ បានធ្វើជាអធិបតី ក្នុងពិធីសំណេះ​សំណាលសួរសុខទុក្ខ​ចំពោះយោធិន​ដែលត្រូវដាក់ឲ្យចូលសោធននិវត្តន៍ចំនួន​ ១២រូប របស់អង្គភាព តំបន់ប្រតិបត្តិការសឹករងមណ្ឌលគិរី នៅក្នុងពិធីនោះលោក បានថ្លែងនូវការកោតសរសើរចំពោះវីរៈភាពរបស់យោធិនយើង ដែល​រយៈកាលកន្លងមក បាន​​​​គោរពនិងអនុវត្តយ៉ាងម៉ឺងម៉ាត់នូវ​បទបញ្ជារបស់ថ្នាក់ដឹកនាំ​​ និងបទបញ្ជា​របស់មេបញ្ជាការ ចូលរួម​យ៉ាងសកម្មក្នុងបុព្វហេតុការពារជាតិ ការពារបូរណភាពទឹកដី ។

លោក ក៏បានផ្ដាំផ្ញើដល់យោធិនយើង ពេលត្រឡប់ទៅមូលដ្ឋានក្លាយជាប្រជាពលរដ្ឋស៊ីវិលវិញ ត្រូវយកចិត្តទុកដាក់គោរពច្បាប់របស់រដ្ឋ ចៀសវាងការប្រព្រឹត្តនៅអំពើដែលផ្ទុយនិងច្បាប់រដ្ឋ យកចិត្តទុកដាក់បង្កបង្កើនផល ចិញ្ចឹមសត្វ និង ប្រកបរបរអាជីវកម្មស្របច្បាប់ ​ដើម្បីលើកស្ទួយ​ជីវភាព​រស់នៅរបស់ក្រុមគ្រួសារឲ្យមានភាពធូរធានិងប្រកបដោយសុភមង្គល និងចូលរួមសកម្មភាពនានារបស់សង្គមដើម្បីលើកស្ទួយ និង អភិវឌ្ឍន៍ប្រទេសជាតិ ឲ្យមានភាពសម្បូររុងរឿង ជឿជាក់លើការដឹកនាំរាជរដ្ឋាភិបាល ស្មោះត្រង់ជាមួយជាតិ សាសនា ព្រះមហាក្សត្រ ។

ក្នុងឱកាសនោះដែរ លោក ឧត្តមសេនីយ៍ទោ​ សាន គឹមអឿន មេបញ្ជាការតំបន់ប្រតិបត្តិការសឹករងមណ្ឌលគិរី យោធភូមិភាគទី១ បានធ្វើពិធី បំពាក់ថានន្តរសក្តិ និងគ្រឿងឥស្សរិយយសថ្នាក់ អស្សរិទ្ធី ដល់យោធិនទាំង១២ រូប និងបានជូនអំណោយមនោសញ្ចេតនារបស់អង្គភាព ជូន​ដល់យោធិនយើង ក្នុងម្នាក់ៗទទួល​បានថវិកាចំនួន ១០ម៉ឺនរៀល និង គ្រឿងឧបភោគ បរិភោគមួយចំនួនផងដែរ៕